Hverjum kemur það á óvart að kennarar séu á móti?

Ef verið er að koma með nýjungar í kennsluháttum, þ.e. stjórnvöld og sveitarfélög (þúst, fólkið sem rekur skólanna), þá er það vaninn að KÍ (stéttafélagið), eða undirsambönd undir þeirri regnhlíf (samtök starfsmanna skólanna), koma með yfirlýsingu þar sem slíku sé mótmælt, eða varað eindregið við.

Það er stefna Sjálfstæðisflokksins að reyna að útskrifa fólk úr framhaldsskólum fyrr en nú er gert og þannig reyna að ná í hælana á nágrannalöndum okkar. En það er sama hvað gert er, alltaf eru kennarar á móti. Þeir voru á móti því að stytta framhaldsskólann um eitt ár, enda var sú tilraun skítamix sem árangur þess að finna lægsta samnefnara í verkefni í samstarfi við KÍ.

En nú er verið að prófa að byrja námið fyrr, kenna innsetningu stafa fyrr, flýta stúdentsprófinu hinum megin frá. Og þetta er allt hægt, þetta er búið að vera gert í Ísaksskóla um áratuga skeið, foreldrar kenna börnum sínum að lesa áður en grunnskólinn hefst. Ég var sjálfur vel læs þegar ég fór í sex ára bekk á sínum tíma. Þetta er ekkert nýtt. En enn eina ferðina eru kennarar á móti.

Ég verð að gjöra svo vel núna og fara heim og segja fimm ára dóttur minni, sem er að nálgast það að vera fluglæs, að hún verði að hætta þessari vitleysu, að ná forskoti á námið og lífið, og fara að leika sér. Kennarar nefnilega vilja það!

Það væri gaman af því ef önnur stéttarfélög hegðuðu sér svona. Ef t.d. SÍB (nú SSF) myndu mótmæla í gríð og erg vinnu Seðlabankans. Eða koma með álit sitt á starfsemi bankanna, hvernig áhættugreining er unnin o.s.frv. Hvað ætli bankastjórarnir myndu segja þá? Ef eitthvað!

Leikskólakennarar andvígir 5 ára bekkjum

Auðvitað er þetta innan valdheimildar stjórnar. Bísness as júsúal

Hæstiréttur og héraðsdómur hefur nýlega skorið úr um, ekki einu sinni heldur tvisvar, að svona baktjaldarmakk þar sem almennir hluthafar eru attaníossaðir af stórum hluthöfum, er bara "Bisness as jusual". Bæði í Baugsmálinu og líka í ÍAV málinu.

Stjórnarmenn og stórir hluthafar mega plotta og hafa af félagi peninga bak við tjöldin eins og þeim sýnist. Þetta er bara á kristaltæru.

Og mér finnst það ömurlegt.

Segir kaup á hlutabréfum innan valdheimildar stjórnar

"enda reki borgin á reiðanum"? Bíddu nú aðeins hæg, frænka!

Þegar eitthvað er rekið á reiðanum þá þýðir það að hlutirnir séu reknir án framtíðarsýnar, án heildarmyndar. En það var einmitt vegna þessa sem Ólafur var svo óánægður í síðasta samstarfi! Borgin var rekin á reiðanum með ykkur, frænka! Hvar var málefnasamningurinn? Hvar var framtíðarstefnan sem þið gátuð sætt ykkur við? Hvar var samkomulagið í málefnunum? Hvergi!

Rekin á reiðanum? Ja hérna hér.

Það nefnilega komu í það minnsta tvær fréttir í fjölmiðlum um að Frjálslyndir óskuðu eftir málefnasamningi og aldrei kom neitt frá ykkur. Í núverandi málefnasamningi eru um 12 atriði sem allir geta skrifað undir, af hverju komuð þið ekki með þann lista til að byrja með, í það minnsta? Það hefði ekki verið erfitt en var ykkur samt um of.

En líklega væri frekar nærri lagi að segja að þið í minnihlutanum viljið láta reka borgina áfram á reiðanum og því séuð þið tilbúin að taka við.

Þú ert miklu betri en svo, frænka, að þú getir sagt eitthvað svona rugl út í loftið og verið stolt af. Gerðu betur næst, því þér tókst svo vel til í að stoppa REI ruglið. Halda áfram á slíkri braut, en ekki í svona ósannindabraut sem þetta skot með "reka á reiðanum" augljóslega var.

Svandís: borgin á betra skilið

Kemur ekki á óvart, það er verið að krefja Ísraelsmenn um frið og að skila stolnu landi.

Það er alveg magnað hvað það virðist vera gersamlega ómögulegt fyrir Ísraelsmenn að sitja á strák sínum þegar verið er að koma á viðræðum og samningum um frið milli Ísraelsmanna og Palestínumanna.

Þegar Clinton boðaði Barak og Yasser Arafat til viðræðna í Bandaríkjunum, og Yasser fékk bestu boð um frið sem sést hafa, voru Ísraelsmenn uppteknir heima fyrir við að berja á Palestínumönnum á fullu. Það sama gerist núna. Þessir djö. Ísraelsmenn geta ekki leyft friðarumleitunum að vera í friði án þess að verið sé að ráðast inn og drepa Palestínumenn eða senda landnema(ótýnda þjófa) inn á landsvæði Palestínumanna og stela því undir vopnavaldi Ísraelsmanna.

Hver einasti maður sem réttlætir svona gjörðir Ísraelsmanna er maður sem veit ekki hvað réttlæti er.

Abbas sakar Ísraela um fjöldamorð

Fimm ára upprennandi þungarokkari

Við Bríet vorum á leiðinni í afmæli vinkonu hennar í gær þegar ég setti Slipknot á fóninn í bílnum. Það var ballaða sem var fyrst fyrir valinu og hún hlustaði á þetta með öðru, við vorum aðallega að ræða saman um heima og geima.

En svo kom næsta lag, dauðarokk eins og Slipknot gerir svo vel. Öskrað og spilað á skrilljón slög á mínútu. Bríet hlustaði á þetta í smá stund og spurði svo, þar sem við vorum að renna í hlað afmælisbarnsins: "Pabbi, verður manni ekki illt í hálsinum á að syngja svona"? Ég brosti og sagði henni að jú, vissulega væri þetta kvalafullur söngur, en söngvarinn væri búinn að gera þetta svo lengi að hann væri orðinn vanur.

Síðan náði ég aftur í Bríeti og á leiðinni heim var aftur hlustað á Slipknot og hún fílar þetta bara mjög vel. Hlustaði á "Spit it out", "Wait and bleed" og "Duality" með miklum hughrifum og kvaðst hafa gaman af. Ég ákvað því að taka næsta skref og kenna henni að hrista hausinn í takt við tónlistina með grettusvip samhliða því að slá á ímyndaðan sneril. Og þetta var allveg að rokka feitt hjá minni fimm ára snót. Það er með yndislegri sjónum að sjá fimm ára þungarokkarasnót að þeyta flösu í takt við eðalþungarokk, með grettusvip og lüft-trommu slögum.

Jamm, ég er búinn að gera hana að rokkara.

Reyndi svo að höfða til klassískra gena í henni með því að setja Rach 3 á fóninn með Mörthu Argerich en það var ekki að rokka. Sú stutta setti bara Slipknot aftur á fóninn. Hún mun vonandi að læra að meta þá snilld síðar meir.

Léleg blaðamennska, bréfið segir miklu, miklu meira.

Ef maður les þessa frétt og les svo bréfið sjálft, rökstuðning Össurar (frumheimild þessarar fréttar) þá skín það í gegn að blaðamaðurinn hefur ekki unnið vinnuna sína. Eða tekur einungis véfengjanlega hlutann út úr fréttinni en skilur eftir öll þau fjöldamörgu MÆLANLEGU atriði sem rökstyðja í spað þessa ráðningu.

Mér þætti gaman að sjá Ragnheiði hrekja þessa rökfærslu Össurar.

Þessi sjalli hér (ég) stend með Össuri í þessu máli. Það er alveg á hreinu eftir að hafa lesið SJÁLFT SVARIÐ. 

Segir Guðna hafa sterka framtíðarsýn fyrir Orkustofnun

Varúð! Skólabörn

Ég var að aka heim frá vinum mínum í Mosfellsbæ, þegar mér varð það á að aka framhjá skóla. Þar hafði einhver sýnt þá fyrirhyggju að setja upp skilti til að vara ökumenn við. Á skiltinu stóð "Varúð! Skólabörn".

Ég gaf í, svo þessi skólabörn myndu nú ekki ná mér og slapp í gegn, ómeiddur. Og það þrátt fyrir að búið væri að setja hindranir á veginn, nokkurs konar stuttar, skarpar hæðir með þrengingum. En mikið lifandi skelfing var ég skelkaður. 

Skrítinn niðurstaða

Bankinn gerði mistök og fólkið fær dóm fyrir að hagnast á mistökunum? Þetta er stórfurðuleg niðurstaða.

Ef ég kaupi t.d. bíl og vegna mistaka er ég afgreiddur með bíl sem er með blæju (viðbót) og ég hagnast þar með á því, er ég þá að brjóta lög ef ég vill halda bílnum eins og hann var afhendur mér? Þetta eru ekki mín mistök! Ég myndi þó skila bílnum en er það ólöglegt að halda eftir einhverju sem maður var afgreiddur rangt með? Var það sannað fram yfir allan vafa að þau hafi verið að brjóta einbeitt af sér þarna?

Það má geta þess að ég er sjálfur forritari í Netbanka Kaupþings, hef því smá innsýn í þetta mál. Og þekkjandi svona hugbúnaðargerð, þá er sök bankans alger. Það er bankinn sem klikkar algerlega á því að prófa hugbúnaðinn sem fer í rekstur, í þessu tilfelli, gjaldeyrisviðskipti í Netbanka Glitnis.

Þetta fólk á það sameiginlegt með Árna Þór Sigurðssyni, þingmanni VG, að það græddi óvart á viðskiptum við/með banka/sparisjóð. Ætli þau séu þá líka VG, ef þau græddu óvart? :)

Skilorðsbundið fangelsi fyrir að nýta sér kerfisvillu banka

Hvernig er hægt að halda þessu fram og taka sig alvarlega á sama tíma?

Þessi frétt er stórkostlega mikið skipsbrot í talnaúrvinnslu.

Teknar eru tekjurtölur Íslendinga skv. skattframtali, summað upp eftir kyni og dregnar ályktanir um laun út frá þeirri tölfræði. Sér enginn neitt athugarvert við þetta? I shall demonstrate hvernig þetta er bara kjaftæði.

Ég er með 100 kr. á klst. í LAUN. Kona mín einnig.

Ég vinn eina (1) klst. á mánuði, kona mín tvo (2).

Hún fær í mánaðartekjur 200 kr., ég 100.

Hún er s.s. með 100% hærri tekjur en ég þó við séum á sömu launum. En það er ekki hægt að taka afstöðu um laun okkar út frá tekjutölunum.

Sviðstjóri Jafnréttisstofu virðist gera þetta samt skv. þessari frétt. Og þessi vinna er unnin undir nýskipuðum framkvæmtastjóra Jafnréttisstofu, Kristínu Ástgeirsdóttur.

Svona rugl gerir ekkert annað en að gjaldfella aðra umræðu um launajafnrétti kynjanna og önnur jafnréttisbaráttumál. Þar að auki hefur verið bent á hversu kolrangt er að vinna þetta svona og tala svo um launamun út frá þeim niðurstöðum. En slík gagnrýni virðist ekki vera marktæk hjá hinnu háverðugu Jafnréttisstofu.

Launajafnrétti árið 2072?

Hvaða vinkona ISG fær þá starfið?

Nú er ISG búin að vera mjög dugleg að ráða (mis)gamlar vinkonur sínar í ýmis embætti og störf á vefum utanríkisráðuneytisins, sama og hún gerði í borginni. Því verður gaman að fylgjast með hvaða vinkona ISG verður þá ráðin forstjóri Radsjárstofnunar á næstu mánuðum.

Það er nefnilega svo sorglegt að sjá stjórnmálamenn fara í nákvæmlega sama farið, og þau hafa gagnrýnt í minnihluta, um leið og í stól er sest. Það er svo sorglegt og ömurlegt að maður bara hlær að þessu í vonbrigðum sínum.

Ólafur Örn segir ráðherra hafa óskað eftir starfslokum hans