Eftirsjá af Illuga

Það er gott að hann sjái það að það er nauðsynlegt að hann víki meðan hans mál eru í rannsókn. En það er samt eftirsjá af honum. Einn af skárri þingmönnum Sjálfstæðisflokksins.

Nú þurfa bara hin að fylgja. Bjarni, Þorgerður, Jóhanna og fleiri. 

Illugi fer í leyfi frá þingstörfum

Samþykkjum þessa afsökunarbeiðni! Lærum af Mandela.

Þetta er skref í rétta átt. Allt byrjar á einu skrefi. 

Upphafið að betrumbót eftir hrikaleg mistök er afsökunarbeiðni, iðrun og auðmýkt. Ef þeirri betrumbót er hafnað af viðtakendum umhugsunarlaust er hætta á að engin frekari afsökunarbeiðni, iðrun né auðmýkt sé væntanleg hjá öðrum í sömu sporum. Nú hefur Björgólfur beðist afsökunar nokkuð afdráttarlaust. Ef við höfnum því afdráttarlaust mun enginn annar sökudólgur biðjast afsökunar. Tilgangslaust.  Og svo munum við spyrja okkur eftir 10 ár: Af hverju baðst enginn afsökunar, annar en Bjöggi?

Það þýðir lítið að krefjast afsökunarbeiðni, sem þjóðfélag, og svo hafna því þegar það kemur. Auðvitað á kallinn að reyna að gera yfirbót líka, sýna auðmýkt o.s.frv. Skila til baka í það minnsta einhverju af því til þjóðfélgsins sem hans gjörðir hafa kostað okkur.

Ef við getum lært eitthvað af Nelson Mandela, þá er það að fyrirgefa. Við verðum að læra að fyrirgefa ef við ætlum að halda áfram sem þjóðfélag.

Mín 5 cent. 

Björgólfur biðst afsökunar

Lambakjöt beint frá skattgreiðendum

Merkileg orð sem formaður Landssamtaka sauðfjárbænda segir.

• Honum finnst hræðilegt að lambið sé að tapa markaðshlutdeild gegn kjúklingi og svínakjöti.
• Það verði að stöðva þessa hræðilegu samkeppni um hylli neytenda.
• Hann nefnir EKKI að styrkir til sauðfjárbænda, teknir frá skattgreiðendum, eru mun hærri á Íslandi en í flestum öðrum löndum þar sem landbúnaður er styrktur af ríkinu.

 

Svo er fólk að bölva LÍÚ sem óvilgjörnum hagsmunasamtökum? 

Eggin og fleskið beint frá banka

Ruglið í Degi, ónýtar heimildir

Dagur segir að Þorbjörg og co hafi talað fyrir því að fyrirtæki taki upp rekstur leikskóla.

Þorbjörg hafnar því að slíkt hafi verið skipulagt eða rætt af alvöru.

Dagur kemur þá með "heimildir" fyrir máli sínu.

Ef maður les heimildirnar, sem Dagur notar til að styðja mál sitt, er þar ekkert að finna sem styður mál Dags. Það eina sem hægt er að finna í heimildunum er að fram hafi farið hugmyndafræðileg umræða um einkavæðingu, einkarekstur og stéttaskiptingu vegna leikskóla í rekstri fyrirtækja. Búið. Og að vísa í blogg ótengdra einstaklinga sem heimild er vægast sagt vafasamt.

Það eina sem hægt er að hengja sig á er að Þorbjörg tala um að leita til fyrirtækja til að styrkja rekstur leikskóla, líklega einkareknu leikskólanna. 

Þetta útspil Dags sýnir að hann er enn samur við sig. Blaður B. Ekkertsson, froðusnakkur.

Mikið óskaplega vildi ég að Dagur færi að taka upp aðra siði og hætta þessu marklausa skítkasti. Hann er eflaust mætur maður með mikið potential. En því lengur sem hann heldur að fólk sjái ekki í gegnum reykbomburnar hans, því lengur verður hann ómarktækur og uppnefndur "Blaður" af fólki eins og mér.

Um leið og hann hættir þessu rugli og fer að vanda málfluttning og heimildavinnu, þá skal ég fara að hlusta á hann og hvað hann hefur að segja. 

Ég veit ekki hvort að fólk muni eftir því, en 2007 var merkilegt ár hvað mönnun leikskóla varðar. Mannekla stóð þeim fyrir þrifum og erfilega gekk að reka þá suma vegna mannfæðar, sama hvað reynt var í að auglýsa stöður. Upp frá því spannst þessi umræða um að reyna að auka fé í rekstur skóla svo hægt væri að hækka laun eða styrkja rekstur þeirra á annan máta, án þess að borgin færi að hækka laun allra leikskólakennara (slíkt kom bara ekki til greina). Og út frá því spinnast þessar vangaveltur Þorbjargar um hvað hægt er að gera.

Að hengja sig á þær VANGAVELTUR (brainstorming) þar sem verið var að leita að lausn, og útata það sem einkavæðingu eða stofnun fyrirtækjaleikskóla, er svo harkalegur útúrsnúningur að það er hreinlega sorglegt. 

Dagur bendir á fyrri ummæli Þorbjargar Helgu

Og hver á spurning að vera?

Viltu nú kvótakerfi?

1. Já

2. Nei

Það er eitt að sjá að núverandi kerfi er gallað og ranglátt, annað að koma með lausnina sem lagar það svo allir séu sáttir. Spurningarnar hér að ofan bera ekki í sér snefil að framtíðarsýn né heildarlausn á vandanum en þetta er sú umræða sem farið hefur fram undanfarið af fólki sem þykist vera svo réttlátt. Gallinn er að réttlæti eitt og sér hefur ekki brauðfætt einn né neinn.

Fram að þessu hefur ríkisstjórnin einungis getað bent á það hvað rangt er en getur ekki fyrir nokkra muni komið með fullmótaðar (eða betur mótaðar en nú  er) hugmyndir um hvernig framtíðarlausn á að vera. Og þá er ég að tala um í smáatriðum. 

Í fréttinni stendur:
" Jóhanna Sigurðardóttir forsætisráðherra og formaður Samfylkingar ítrekaði fyrri yfirlýsingar sínar á fundinum þegar hún lýsti því yfir í ræðu sinni að hún telji það vera góða „leið til þess að útkljá áratuga deilur um innköllun aflaheimilda og endurúthlutun þeirra að láta kjósendur um að leiða málið til lykta í þjóðaratkvæðagreiðslu". Þá sagði Jóhanna í lokaorðum sínum á fundinum að möguleg þjóðaratkvæðagreiðsla gæti farið fram næsta haust samhliða þjóðaratkvæðagreiðslu um stjórnlagabreytingar." 

 Endurúthlutun!  Já, það var einmitt það. Úthluta upp á nýtt. Hvernig? Til hverra? Hversu lengi? Gegn endurgjaldi? Eða ekki? Í gegnum byggðarkvóta? Hver fær? Fer þetta á marka? Til leigu? Sölu?

Það er eitt að þekkja ranglætið. Annað að þekkja réttlætið. Mikið hefur verið fjallað um ranglætið, sem er fortíðarmál. Réttlætið er framtíðarmál og á því munum við byggja afkomu okkar. Er þá ekki kominn Andskotans tími til að fara að fjalla um það?

Því þá kannski verður hægt að spyrja um betri möguleika og úthugsaðari en bara innihaldslaust Já/Nei sem sett er upp hér að ofan. 

Samfylkingin vill þjóðaratkvæði um fiskveiðistjórnunarkerfið

Vampíran skilur ekki vanþakklætið

Venjuleg Vampíra blóðmjólkar fórnarlömb sín þar til þau deyja. Aðrar, þessar snjöllu, blóðmjólka fórnarlömb sín þar til þau eru alveg að deyja. Hætta þá svo að fórnarlambið lifi til að láta blóðmjólka sig meir og meir. S.s. búa til lifandi tekjustofn. 

Fyrrum yfir-nossari Íslands, Indriði, hefur skilið þetta og skilur ekki vanþakklætið í okkur mjólkurkúnnum fyrir að þakka ekki fyrir okkur þegar við fáum að lifa svo hægt sé að blóðmjólka okkur. Við fáum jú að lifa!

Indriði er snjöll vampíra, enda menntaður hagfræðingur frá Austur-Berlín hinni fornu, mekka evrópskra mennta-fornkommúnista. 

Já, sjaldan launar blóðmjólkurkálfurinn ofeldið. Grey Indriði, svo misskilinn. 

Ríkið segist lækka skatta skuldara

Gott mál - nú fer þetta kannski underground

Ég fagna þessum lögum, því jú, það hefur verið sýnt fram á að samhliða þessari "listgrein" eru vandamál sem þarf að vinna bug á. Vonandi heftir þetta bann mannsal á Íslandi.

Gallinn er tvennskonar. Það er hætta á að þessi iðja annað hvort fari framhjá banninu eða fari í undirheima. Þegar það síðarnefnda gerist verður það alltaf verra fyrir þær konur sem eru þarna við iðju sína.

Svo er líka annar flötur: Mannsal á Íslandi, þ.e. það sem hefur komist upp, hefur verið þannig að um útlendinga er að ræða, sem fluttir eru nauðugir hingað, eða flytjast hingað á fölskum forsendum og er haldið hér nauðugum. Þeir verða áfram í mannsali. Bara annars staðar í heiminum. 

Alþingi bannar nektardans

Stöðuleikasáttmálinn endanlega fyrir bí?

Ég held að það sé ekki úr vegi fyrir fólk að lesa Stöðuleikasáttmálann (pdf). Tilgang hans, markmið, skref í átt að markmiðinu og framvitndu.
SA og ASÍ hafa staðið við sitt.

Ekki ríkið.

Bendi ég á lið 4 á bls 2 og lið 13 á bls 4.

Tilvitnun:
-----------------------

4. Framkvæmdir til að stuðla að aukinni atvinnu
Ríkisstjórnin mun greiða götu þegar ákveðinna stórframkvæmda sbr. þjóðhagsáætlun, s.s. framkvæmda vegna álvera í Helguvík og Straumsvík. Undirbúningsvinnu verði hraðað vegna áforma sem tengjast fjárfestingu í meðalstórum iðnaðarkostum, s.s. gagnaverum og kísilflöguframleiðslu.
Kappkostað verður að engar hindranir verði af hálfu stjórnvalda í vegi slíkra framkvæmda eftir 1.nóvember 2009.
Einnig verði unnið skipulega að úrvinnslu áforma um aðrar stórfjárfestingar í atvinnulífinu þannig að taka megi ákvarðanir sem fyrst um hugsanlegan framgang þeirra.


13. Fyrirvari Samtaka atvinnulífsins vegna sjávarútvegsins
Samtök atvinnulífsins viðhalda þeim fyrirvara gagnvart framlengingu kjarasamninga að vinna á vegum ríkisstjórnarinnar um endurskoðun fiskveiðistjórnunar verði í þeim sáttafarvegi sem lagt var upp með við skipan nefndar til þess að vinna að því máli.

-----------------------

Veltið því svo fyrir ykkur hver hefur EKKI staðið við sitt. Ítrekað.

Mér er sama hvaða afstöðu fólk hefur til ríkisstjórnar, ASÍ eða SA. Samkomulag er málamiðlun svo að aðilar með mismunandi skoðanir og hagsmuni geti komist að sanngjarnri niðurstöðu. Nú hefur einn aðili að Stöðuleikasáttmálanum (ríkisstjórnin) ítrekað gefið skít í hann á meðan aðrir standa við sitt.

Þetta væri kannski ekki svo mikilvægt ef ekki lægi fyrir sú staðreynd að þeir samningar, sem frestað var af launþegasamtökum og SA, verða lausir í haust. Þessi launþegasamtök eru m.a. KÍ og BSRB.

Veltið því fyrir ykkur í hversu miklum sáttarham þessi samtök verða í garð ríkisstjórnarinnar þegar kemur að samningum. Svo ég tali nú ekki um algeran trúnaðarbrest. Með lögunum á flugstéttirnar undanfarna daga í ofanálagt.

Ríkisstjórnin er ekki einungis að stórhamla allri uppbyggingu hérlendis og framlengja miklu atvinnuleysi. Hún er líka að strá vantrausti og illindum hjá fólki sem mun kljást við ríkið í haust.

Og hvorki ríkið né SA á túskilding með gati í til að hækka laun.

Skötuselsfrumvarp að lögum

Við erum Collateral Damage

Þessi leið er líklega farin svo að "útrásarvíkingarnir" sleppi ekki við refsingu skattmanns vegna afskrifta.

Það er því verið að skjóta hjörðina alla til að ná tarfinum í miðjunni.

Collateral damage heitir þetta á ensku. Þegar almennir borgarar falla í stríði.

Ég þakka Steingrími kærlega fyrir þessa páskagjöf til samlanda sinna.

Er það nema von að Sjálfstæðisflokkurinn sé aftur kominn með yfir 40% fylgi í könnunum. 

Afskriftir verða skattlagðar

Samningar lausir í haust. Verður þetta trendið?

Ég veit ekki með aðra en mér finnst þetta fordæmi mjöööög varhugavert. Ekki einungis að fara svona í grímulausa mismunum á stéttum hvað verkfallsréttin varðar (strax á degi 2) heldur líka það að samningar eru almennt lausir í haust. Þá verða samningar við mannmargar stéttir lausir og það er eiginlega borðleggjandi að við eigum eftir að sjá verkfallaholskeflu ríða yfir landið. Því ekki á ríkið peninga til að hækka laun. Né heldur atvinnurekendur, þar eru pyngjur tómar líka (og ekki að þakka hækkun á tryggingargjaldi um daginn).

Launahækkunum var slegið á frest í fyrra í stöðuleikasáttmálanum svokallaða. Síðan þá hefur ríkisstjórnin farið í fararbroddi við að brjóta þann sáttmála. Og það forkastanlegasta var útspil Svandísar Svavars í að TEFJA (ekki slaufa) verkefni sem voru borðleggjandi atvinnuskapandi fyrir hundruð, ef ekki þúsundir, manna og kvenna. Ríkisstjórnin virðist ekki hika við að berja nokkurn vaxtarbrodd í útfluttningtekjum þjóðarinnar, nema kannski með því að brjóta á verkfallsrétti stéttar, bara vegna þess að þau eru með svo há laun.

Talandi um há laun. Faðir minn, vélstjóri til áratuga, reiknaði einu sinni laun sín (hann var með góðar tekjur þá) og komst að því að hann var með lágtaxta Dagsbrúnarlaun þegar dagvinna og yfirvinna var reiknuð upp. 

Það er mér til efs að flugumferðastjórar séu með einhver himinhá laun, þótt tekjuháir séu. Fyrir utan álagið sem starfinu fylgir.

Má vel vera að þetta sé réttlætanlegt. Ef svo er, af hverju var kennaraverkfalli leyft að vera í sex (6) vikur 2004? Er nú menntun barnanna okkar minna virði en smá tafir í flugi í örfáa klukkutíma fyrir afmarkaðan hóp fólks, sem að mestu leiti eru ekki einu sinni íslenskir ríkisborgarar? 

Gagnrýna inngrip hins opinbera