Lygi, haugalygi, tölfræði hjá koppaþefandi forvitnispúkum

Úlfar Kristinsson heitinn, stærðfræðikennari minn í Versló forðum daga, stigbeygði fyrir okkur lýsingarorðið "lygi" eitt sinn (ég veit, lygi er nafnorð) og það var svona: "Lygi, haugalygi, tölfræði". Fyrir utan það að vera algerlega andsnúinn því að fjárhagsupplýsingar einstaklinga séu á borð bornar fyrir koppaþefandi forvitnispúka, þá fara aðilar, eins og Frjáls Verslun, offari í tölfræðilegri greiningu sinni eins og vanalega. Og græða smá pening á þessu í leiðinni.

Hver er forsendan fyrir þessum útreikningum hjá þeim? Heildarútsvar skv álagningarseðlum. Og koppaþefandi forvitnispúkar falla í þá gryfju að draga þá ályktun að þetta sé þá það sem þetta fólk hefur í mánaðarlaun. Sem er ekki endilega rétt. Þetta er sú tala sem gefin var upp til skatts síðasta ár, ekki endilega mánaðarlaun, heldur summan af öllu heila klabbinu.

Ég þekki einn mann sem var í nokkur ár framkvæmdastjóri fyrirtækis sem hafði 300+ starfsmenn í framlínustörfum. Hann var vel liðinn og var á sæmilegum launum. En eitt árið fékk hann greiddan uppsafnaðan árangurstengdan bónus fyrir nokkur ár og skattatölur hans árið eftir, skv. álagningarseðli, sýndu fram á að hann væri 1,5 milljón á mánuði. Sem var fjarri hinu sanna. En þegar koppaþefandi forvitnispúkar voru búnir að þefa uppúr koppum skattmanns og fá sitt, þá héldu starfsmenn þessa framkvæmdastjóra að þau laun sem Frjáls Verslun gaf upp, væru mánaðarlaun hans.

Verði Frjálsri Verslun að góðu.

Annars er ég stoltur starfsmaður Kaupþings banka og er glaður yfir því að forstjórinn, sem hefur leitt bankann, ásamt Sigurði Einarssyni, upp í að vera 142. stærsti banki í heimi, og besti bankinn á norðurlöndum, skv. bankatímaritinu Euromoney, sé á svona góðum launum. Hann á þau svo sannarlega skilið.

Hreiðar Már með hæstu tekjurnar samkvæmt tekjublaði Frjálsrar verslunar

Athugasemdir

[Ólafur (IP-tala skráð) 1.8.2007 kl. 21:32]

Það er óþarfi að taka "Heil Hreiðar" þó að maður starfi hjá Kaupþingi, sem er búinn að standa sig vel og allir starfsmenn. Málið snýst ekki um það. Þú ert greinilega reiður og finnst vegið að þínu fólki, það er alls ekki þannig, þú átt ekki að taka þessu svona persónulega, þetta eru nauðsynlegar upplýsingar í lýðræðisþjóðfélagi til að einmitt auka umræðu. Menn eiga að greiða sína skatta stolltir, eins og ég veit að Hreiðar gerir, því annars myndi hann greiða þá annars staðar á einhvern hátt.

[Gammurinn, 1.8.2007 kl. 21:47]

Þarna hitti Sigurjón Sveinsson naglann á höfuðið eins og svo oft

áður. Hann getur verið stoltur af skoðunum sínum því það er ekki á

hverjum degi sem maður sér þá sem eru fylgjandi því að menn fái greitt

eftir verðleikum sínum viðra skoðanir sínar. Gammurinn heyrir endalaust

í kommúnistum sem býsnast yfir hinum svokölluðu "ofurlaunum" en það er

ekkert annað en öfundsýki og hálfvitaskapur því "ofurlaun" eru ekkert

annað en fylgifiskur þess að Íslensk fyrirtæki eru í sífellt auknum

mæli að ná hinum margrómaða "heimsmælikvarða".

Við Íslendingar

getum verið stoltir af þessari þróun. Eftir nokkur ár verður hætt að

nota þetta orð "ofurlaun" því þá verða það margir í þeim launahópi að

það verður ekkert merkilegt lengur.